Кавалкін: «Будзе моцны шок па цэнах, пастаўках, лагістыцы»

Эканаміст Уладзімір Кавалкін распавёў, як на беларускай эканоміцы адаб’ецца закрыццё польска-беларускай мяжы. У выпадку, калі яе адчыняць адразу пасля сканчэння расійска-беларускіх вучэнняў і ў выпадку, калі закрыццё будзе значна даўжэйшым.

— Калі хутка адчыняць, то гэта будуць невялікія лагістычныя страты, адсоткі працэнтаў гадавой выручкі. Беларусы нават не адчуюць. Лагістычныя перабоі наладзяцца потым цягам двух тыдняў, — кажа Кавалкін у эфіры Еўрарадыё.

Калі ж гэта будзе бестэрміновае закрыццё на нявызначаны час, то наступствы будуць больш значныя, адзначае эканаміст:

— Імпарт падаражэе 20-30-%. Не знікне, проста будзе дарагім, бо будзе дарагая лагістыка. Будуць везці праз Літву і Латвію, стаяць у чэргах, калі яны таксама не закрыюць межы. Нават калі закрыюць, будуць вазіць праз Расію. А лагістычнае пытанне гэта заўсёды пытанне грошаў. Гэта інфляцыя, падаражэнне імпарту, магчымае знікненне нейкіх тавараў, якія не надта карысталіся попытам, але былі, бо лагістыка каштавала недорага.

Таксама скончыцца ўвесь прыватны гандаль на мяжы — то бок усе, хто жыў у Брэсце і зарабляў туды-сюды ганяючы папяросы і гарэлку, не змогуць гэтага рабіць. Застанецца толькі нейкі крымінальны гандаль, напрыклад, калі дастаўляюць папяросы праз дроны. А можа і па рэчцы будуць адпраўляць. Але гэта будзе цяжка.

Таксама вельмі моцна загнецца беларуская лагістыка. Людзі, якія працуюць у гэтай сферы, будуць мець праблемы з заробкамі, а частка з іх згубіць працу.

Таксама будуць страты, звязаныя з беларускім экспартам у ЕС, бо 70-80% нашага эксперта ідзе па сухапутнай мяжы, бо ў нас не мора. Таму калі нешта вазіць, то толькі праз расійскія парты. Самы бліжэйшы — у Піцеры. Але расійскія парты зараз і так вельмі нагружаныя.

Таму, калі мяжа будзе зачынена на доўгі тэрмін, гэта будзе моцны шок — на бліжэйшы год дакладна. Шок па цэнах, пастаўках, лагістыцы. Гэта адаб'ецца і на прамысловасці — але не скажу канкрэтна, бо гэта ведаюць на месцах — тыя, хто штосьці закупае ў Еўразвязе.